آی؛

سئوگی پایلاشماقدایدی

گئجه‌نین یاریسی

اولدوزلا برابر

بیر گؤلون ایچینده.

من ده

سئیر ائتمکده

ایکی گؤزلین گؤزل‌لیگینی

باشقا اولدوزلار کیمی.

سو ایچمک ایچین بیر ککلیک

سویا گیردی بیر آنلیق.

و آی‌لا اولدوز قوجاقلاشدیلار

گونش دوغولدو....

** ککلیک‌لر، گون چیخان زامان سو ایچمک ایچین بولاق‌لارا گئدرلر.

25/02/1391

بیر، ایکی، اوچ...

سایی‌یا گلمز قدر چوخموشلار.

بلکه بیریسی منیم اولا بیلیر

بلکه ده هر کس ایچین بیریسی وارمیش.

کئشکه الیم چاتسایدی؛

بیر اولدوز درمه‌یه...

18/02/1391

او گون یوخودان آییلدیغیمدان سونرا

تلویزیون اؤنونده اوتوروب

بیر پروگراما تاخیلدیم

قارغالارین یاشامینا داییر بیر فیلیم.

و سونراسی کوچه‌یه چیخدیغیمدا

قار... قار... قار...

قار ها قار سالمیشدی....

قارا بیر قارغا.

ائوه دؤنرکن

قار ها قار سالان قارغادان خبر یوخودو آرتیق.

آما سنین مکتوبون گلیب چاتمیشدی

هر شئی بیتدی سؤیله‌میشدین.

08/02/1391

آسماغیمدان اؤترو

توک‌لرینی بیر داها دا داغیت

سینه‌نین اوستونه

دویغولاریمی سریم

سید حیدر بیات- آلما یولو کتابی- نوید اسلام- ۱۳۸۷

نه بیلیدیم او آن دا

منی آسماق ایستیرمیشسن!

ایندی اؤلومله یاشام آراسیندا

آسیلی بیر یاپراغام.

نه اولور آچ هؤروک‌لرینی

و یاشاما دؤندر منی.

یا دا برکیدیب قورتار

منی بو آسیلی یاشامدان!

8/02/1391

بو گوزگويه بير واخت قوشا باخارديق،
بو گوزگوده يئرين ايندي بوش قاليب.
بلکه سندن بو گوزگونون جانيندا
دوداق قاليب، کيرپيک قاليب، قاش قاليب؟
گؤز ياش‌لارين جانيندادي، بلکه ده
داملا- داملا ارييه‌جک بو گوزگو.
بير گون سنين آياغينلا دونيادا
آياق آچيب يئرييه‌جک بو گوزگو.
بلکه، سني آختاراجاق، گزه‌جک
ميليون- ميليون آدام‌لارين ايچينده.
گؤرن کيمي تانيياجاق اوزونو
ان قارانليق آخشام‌لارين ايچينده.
قاچاجاقسان بو گوزگونون اليندن،
دؤنه‌جکسن او دؤنه‌گه، بو تينه.
آدام‌لاري، ماشين‌لاري، ائولري
آتاجاقسان بو گوزگونون جنگينه.
يئنه، يئنه دويماياجاق بو گوزگو،
بير شهري اودوب، اودوب گله‌جک.
سني گؤزدن قويماياجاق بو گوزگو،
يئري-گؤيو توتوب، توتوب گله‌جک.
سن قاچديقجا يئلله‌نه‌جک ساچ‌لارين،
بو گوزگويه پاي دوشه‌جک ساچيندان.
ايپک دونون يئللنديکجه، گوزگويه
پاي دوشه‌جک اتگي‌نين اوجوندان.
قاچيب-قاچيب اؤزونو يوراجاقسان،
قفيل بيردن گؤره‌جکسن او داشي.
بو گوزگونو داش آتيب قيراجاقسان،
بو گوزگودن داغيلاجاق گؤز ياشين.
هر تيکه‌سي قاييق تکي اوزه‌جک
دؤرد طرفي گؤز ياشينلا دولونجا.
بو گوزگونون بلکه هر تيکه‌سيندن
دوداق‌لارين چيغيراجاق دالينجا.
...بو دا بئله بير ناغيلدي يالاندان،
سن کي يوخسان، گئتديگين او گئدندي.
بو گوزگو ده يئرينده‌دي، يئرينده،
بو گوزگو ده يئنه ساغدي، بوتؤودو.
سينان گوزگو آخي بير ده جانلانماز،
بلکه تانري اؤزو گؤروب بو ايشي؟!
بو گوزگونون هر تيکه‌سي، بلکه ده،
داملا-داملا گؤز ياشينلا بيتيشيب.
بلکه سندن بو گوزگونون جانيندا
دوداق قاليب، کيرپيک قاليب، قاش قاليب.
گؤز ياش‌لارين جانيندادي هله ده،
گؤز ياش‌لارين قوروماييب، ياش قاليب.
بو گوزگودن گليب کئچير خانيم‌لار،
اؤزلرينه باخيب-باخيب کئچيرلر.
دوداغيندان دوداق‌لاري رنگ آلر،
کيرپيگيندن کيرپيک تاخيب کئچيرلر.
گؤز ياشينلا دولور، دولور گؤزلري.
باخير يئره، باخير گؤيه، آغلايير.
بو نه درددي - هئچ بيلميرلر اؤزلري،
هئچ بيريسي بيلمير نييه آغلايير...

هدف قوتسال
هرکیم اولورسان اول
داغ، دره، دومان، یول
من هر گئجه، سنین چون آغلارام
یا سن زنگانداکی یاندیریلان یوزاللی کیشی
یا سن سالماسداکی دوغرانیلان بیر عسگر
یاسن وارلیغین بیراخیب تهرانا گئدیب دووارلار دیبینده پورتاغال ساتان
یا سن نوه سینین دیلین آنلامایان بیر آغساققال بابام
یا سن ماهنی سی دوداغیندا پاسلانمیش آغ بیرچک آبام
هرکیم اولورسان اول
من هرگئجه سنین چون آغلارام

آفيق آغداملي- قاراباغ

آغلاما، آنام قاراباغ،
بيز هله چت‌له مشغولوق...
غیرت بيزدن دوشوب اوزاق،
بيز هله چت‌له مشغولوق...

خبر سالميسان دونيايا،
کؤمک ائده‌جه‌یيک گويا؟!
اينانما کي، کيمسه دويا،
بيز هله چت‌له مشغولوق...

توتولاجاق وئريلن "سؤز"،
دؤز، آي آنا، دؤز، هله دؤز...
بيزي يادا سالما تئز-تئز،
بيز هله چت‌له مشغولوق...

کيمه‌دير سيتمين، کيمه؟
بيزدن هئچ کوسوب اينجيمه...
بيزه "اوغلوم"،"قيزيم" دئمه،
بيز هله چت‌له مشغولوق...

تورک يوردوسان، نيدا! آما...
پاي وئرمه‌ريک يادا! آما...
جانيميز دا فدا! آما-
بيز هله چت‌له مشغولوق...

فدوا توقان- دوغوم 1917- نابلوس شهری

اؤلوم و خیانتین گلدییی گون؛

هئچ یاندان یاردیم گلمه‌دی

سمانین قاپی‌لاری باغلاندی

شهریمین بختی کیمی.

مغلوبیت‌ین قودوز دالغاسی

اوستوموزه آتیلان گون؛

دنیزین دیبینده‌کی چیرک آب

اوزه چیخدی؛

اومید کور اولدو؛

منیم غمگین شهریم

قهردن بوغولدو...

قایناق: ترجمه چلنگی، مسیح آقا محمدی

یازین ایلک گون‌لری

هله آغاج‌لارین یاپراق‌لاری آچیلمامیش.

بیلینمه‌ین بیر یئرده

و ساعات 4-او 15 کئچنده

بیر آغاجین دالیندا

تکجه بیر یاپراق آچیلدی.

بیلینمز بیر نه‌دن‌له

بیریسی داردان آسیلدی.

کیم اولدوغونو و نه‌دن او زامانی سئچدیگینی

تانری‌سیندان باشقا کیمسه بیلمه‌یه‌جک.

دان اولدوزو دا شاهد اولمادی او آن دا.

اونا:

«انتحار چیچه‌یی» دئییلدی.